திருநெல்வேலி:தமிழகம் முழுவதும் இன்று(1ம் தேதி) முதல் வட்டார போக்குவரத்து அலுவலகத்தில் பதிவு செய்யும், விலை உயர்ந்த கார்களுக்கான பதிவு கட்டணம் 2 முதல் 7 சதவீதம் வரை உயர்த்தப்படுகிறது.

இந்த பதிவு கட்டண விகிதத்தில் சிறிது மாற்றம் செய்ய அரசு முடிவெடுத்தது. அனைத்து வாகனங்களுக்கும் கூடுதல் வரிகள் விதிக்கப்படும் என முதலில் எதிர்பார்க்கப்பட்டது.ஆனால் சொகுசு கார்களுக்கு மட்டும் பதிவு கட்டண சதவீதத்தை உயர்த்த முடிவு செய்யப்பட்டது. இதன்படி ரூ.10 லட்சத்திற்கு உட்பட்ட கார்களுக்கு 8 சதவீதமாக இருந்த பதிவு கட்டணம் 10 சதவீதமாகவும், ரூ.10 லட்சத்திற்கும் மேற்பட்ட விலை உயர்ந்த சொகுசு கார்களுக்கு 15 சதவீத பதிவு கட்டணமும் உயர்த்தப்படுகிறது. இதன் முலம் அரசுக்கு கோடிக்கணக்கில் வருவாய் அதிகரிக்கும்.

2 நாட்களில் 500 வாகனங்கள் பதிவு:தமிழகம் முழுவதும் அனைத்து வாகனங்களுக்கு 2 சதவீதம் பதிவு கட்டணம் கூடுதலாக விதிக்கப்படும் என தகவல் பரவியது. இதன் காரணமாக கார், பைக் ஏஜென்சி நிறுவனத்தினர் தங்களது வாடிக்கையாளர்களை அழைத்து உடனடியாக வாகனங்களை பதிவு செய்யும்படி அறிவுறுத்தினர். நெல்லை வட்டார போக்குவரத்து அலுவலகத்தில், வழக்கமான கூட்டத்தை விட வாகனங்களை பதிவு செய்பவர்களின் கூட்டம் அலைமோதியது.கடந்த 2 நாட்களில் மட்டும் சுமார் 500ற்கும் மேற்பட்ட கார்,பைக்குள் புக்கிங் செய்யப்பட்டன என்பது குறிப்பிடத்தக்கது.